Pesë shkolla në të gjithë vendin, të dëmtuara nga tërmeti i 26 nëntorit, janë shembur ditën e sotme, për t’u rindërtuar sërish.
Shkollat e shembura janë “Sami Frashëri” në Tiranë, “Ramazan Subashi” në Vorë, “Sherif Dervishi” në Krujë, “16 shtatori” në Shijak dhe “Charles Telford” në Kavajë.
Kryeministri Edi Rama bëri me dije se klasat e reja nuk do të jenë të mbingarkuara dhe secila do të ketë nga 24 nxënës.
Shefi i qeverisë, nisur edhe nga situata e krijuar për shkak të COVID-19, kërkoi që shkollat të pajisen me kapacitete digjitale, në mënyrë që të ketë kombinim mes mësimit online dhe atij në klasë.
“Ndërkohë që standardi është eurokod 8, hapësirat mësimore rriten kapacitetet për klasë shkon në 24 nxënës, që është fantastike. Në klasat kopsht parashkollor ka rritje të klasave dhe ulje të numrit të nxënëseve, me laborator të gjitha shkollat, të gjitha bibliotekë, palestër, me dush, garderodë. Kanë të personalizuar zyrat, sallat e mësuesve, bllokun e shërbimeve dhe pista vrapimi, fushë për basketboll, volejboll dhe tenis, minifutboll.Një element i rëndësishëm është që sjell situata e re e krijuar që nuk do të mbarojë shpejt, edhe procesi i hapjes do të jetë i distancimit social dhe duhet me futur elementin e kapacitetit dixhital për të pasur një kombinim mes mësimit në klasë dhe atij online deri kur mortja të ketë marrë fund me vaksinën të kemi turne të javës, me një pjesë që vjen në klasë dhe një pjesë që vijon nga shtëpia. Të pajisim me kapacitet komunikimin shkollat dhe fëmijët. Kjo duhet mbajtur parasysh” tha Rama.
Ahmetaj ndërkohë nga ana tjetër premtoi se më 1 nëntor, 40 shkolla do të jenë gati për fëmijët.
“Menjëherë pas marrëveshjes kuadër fillojnë ofertat dhe besoj që brenda 1 nëntorit kjo parti shkollash do të ketë mbaruar, që janë mbi 40, duhet të ishin 59, por 22 i ka marrë UNDP, KE-ja. Atë afat që kemi vendosur do ta ndjekim, me shkollat, 24 orë në punë, për t’u futur nxënësit në 1 nëntor” tha Arben Ahmetaj.
