Policia e Qarkut të Gjirokastrës ka njoftuar se alpinistët e bllokuar pak më parë në malin e Murganës sipër fshatit Sotirë janë jashtë rrezikut për jetën. Në njoftim thuhet se një prej tyre, 17-vjeçari me iniciale E.K. ka dëmtuar këmbën dhe ata kanë kërkuar ndihmë. Forcat e Ushtrisë dhe forcat Shqiponja dhe policia vendore janë nisur drejt malit për të ndihmuar alpinistët, ndërsa momentalisht po transportohen mjetet e tyre.
Më herët u dha në media lajmi se disa alpinistë janë bllokuar në malin e Murganës pasi një prej tyre kishte thyer këmbën dhe ata nuk mund të lëviznin.
NJOFTIMI I POLICISË SË SHTETIT:
Gjirokastër/ Informacion Paraprk
Në sallën e Drejtorisë Vendore të Policisë Gjirokastër ka ardhur një telefonatë se disa alpinistë ndodhen në malin Morgan, mbi fshatin Sotirë dhe kanë nevojë për ndihmë pasi shtetasi E. K., rreth 17 vjeç është rrëzuar dhe ka dëmtuar këmbën.
Menjëherë pas njoftimit janë nisur për në malin Morgan, forcat Shqiponja të DVP Gjirokastër, shërbimet e Postës së Policisë Dropull dhe Forcat e Ushtrisë për tiu ardhur në ndihmë këtyre shtetasve.
Aktualisht këta shtetas po ndihmohen nga shërbimet e policisë, ku po transportohen me mjetet e policisë drejtë fshatit Sotirë dhe asnjë prej tyre nuk ka rrezik për jetën.
