Vrasja e Klodian Rashës, më datë 8 dhjetor të vitit të shkuar, shkaktoi shumë trazira në vend e protesta të shumta. 25-vjeçari u vra nga ish-efektivi i forcave “Shqiponja”, Nevaldo Hajdaraj. Dosja penale e ish-efektivit, kaloi sot për gjykim. Në Gjykatën e Tiranës, është zhvilluar seanca paraprake ndaj ish-efektivit, i akuzuar për vrasjen e 25-vjeçarit Klodian Rasha mëngjesin e 8 dhjetorit në zonën e Laprakës.
Seanca paraprake u kryesua nga gjyqtari Bedri Qorri. Avokati i ish-policit kërkoi ndryshimin të akuzës nga “vrasje me dashje”, në “vrasje në kapërcim të kushteve të mbrojtjes së nevojshme”. Por kjo kërkesë e avokatit të Hajdarajt, është rrëzuar poshtë nga Gjykata. Gjatë seancës gjyqësore, Nevaldo Hajdaraj i ka kërkuar falje Qazim Rashës, babait të viktimës në sallën e gjyqit.
Ndaj ish-efektivit të forcave “Shqiponja”, Prokuroria ka ngritur akuzën e vrasjes me dashje. Vetë Hajdaraj ka qenë i pranishëm në seancën e sotme gjyqësore, ku gjatë gjithë kohës ka qëndruar me kokën ulur, siç shihet dhe në fotot e mëposhtme.
Ngjarja e Klodian Rashës ka ndodhur para më shumë se tre muajsh dhe SHÇBA (Shërbimi për Çështjet e Brendshme dhe Ankesat), ka bere një reagim fillimisht kur ka ndodhur ngjarja. Më pas, Hajdaraj ka kaluar nën hetim dhe është shkarkuar. Kolegu i tij, Erion Gore, u pezullua për 7 dite nga SHCBA, deri sa u sqarua roli i tij ne ngjarje. Pas 7 ditësh, Gore u rikthye ne detyre, duke marrë vetëm dënimin minimal.
Me rrëzimin e kërkesës së avokatit të Hajdaraj, çështja ka kaluar në gjykim për akuzën “vrasje me dashje” dhe se kur do të jepet dënimi përfundimtar, nuk kemi ende një datë konkrete. Ngjarja e 8 dhjetorit ku mbetur i vdekur Klodian Rasha, është ende një ngjarje që merr vëmendje të madhe.
