Gjykata e Tiranës ka konfirmuar masën e sigurisë “arrest me burg” për Flodian Plakun, i njohur edhe me mbiemrat Mamo dhe Serjani, i cili akuzohet për vrasjen e Gentian Bejtjas më 15 mars 2024 në Larushk të Fushë-Krujës.
Plaku, 41 vjeç, i njohur edhe me nofkën “Pole Qorri”, u kap më 3 gusht në Orikum gjatë operacionit të koduar “Eterna”.
Në momentin e ndalimit, atij iu sekuestruan 17 fishekë, 7 telefona celularë, 25 mijë euro në cash, si dhe dy armë zjarri, njëra prej të cilave ishte me fishek në fole.
Pavarësisht akuzës, Plaku ka mohuar përfshirjen në ekzekutimin e ish-policit Bejtja. Para togave të zeza, ai deklaroi se dyshohet vetëm sepse kishte përdorur një automjet tip “Golf”, të ngjashëm me atë që dyshohet se është përdorur nga autorët e vrasjes, dhjetë ditë para ngjarjes.
Në seancë, ai u përfaqësua nga avokati Edvis Gorishti, i caktuar kryesisht nga gjykata, i cili kërkoi një masë më të butë sigurie, por kjo kërkesë u refuzua.
Përveç Plakut, policia arrestoi edhe tre persona të tjerë nën akuzën “Përkrahje e autorit të krimit”, pasi dyshohet se ndihmuan në strehimin dhe lëvizjen e tij gjatë kohës që ishte në kërkim.
Të arrestuarit janë:
• Albano Lapshi, që i çonte ushqim në hotelin ku fshihej Plaku;
• Ligor Doko, pronar i hotelit ku strehohej;
• Armand Dano, berber nga Shkodra, i cili dyshohet se e qethte për ta ndihmuar të mos njihej.
Hetimet për zbardhjen e plotë të ngjarjes vijojnë.
