Efektivët e forcave “Shqiponja”, pas tentimit për t’i shpëtuar postbllokut të ngritur, kanë arritur që të ndalojnë 32-vjeçarin Klevis Balloku, i cili rezultonte i shpallur në kërkim.
Pas tentimit për tu larguar nga postoblloku, 32-vjeçari ka aksidentuar dhe një nga punonjësit e Policisë Rrugore që ishin aty. Për fat të mirë polici i Rrugores gjendet jashtë rrezikut për jetën, nën mbikqyrjen e mjekëve.
Por kush është Klevis Balloku, një emër i njohur për policinë pasi ka disa precedentë penalë, mes tyre edhe rrëmbimin e marrjen peng të familjes së tij.
Njoftimi i policisë:
Nuk i bind urdhrit për të ndaluar, aksidentoi punonjësin e Policisë dhe u largua nga vendngjarja, kapet në kohë rekord autori i dyshuar.
32-vjeçari që drejtonte mjetin, person me precedent të theksuar kriminal në fushën e armëmbajtjes pa leje dhe heqjen e paligjshme të lirisë.
Më datë 01.10.2020, rreth orës 12:00, në aksin rrugor Fushë Krujë-Tiranë, në një nga pikat e kontrollit e ngritura në kuadër të Planit të Masave, për parandalimin dhe goditjen e paligjshmërisë, kapjen e personave në kërkim dhe atyre që lëvizin me armë zjarri, shërbimet e Policisë i kanë shenjë një mjeti tip “Audi” për të ndaluar, por drejtuesi është larguar me shpejtësi duke aksidentuar punonjësin e Policisë Rrugore, i cili është dërguar në spital, nën kujdesin e mjekëve, jashtë rrezikut për jetën.
Shërbimet e Policisë i janë vënë menjëherë në ndjekje dhe e kanë arrestuar në flagrancë shtetasin K. B., 32 vjeç, banues në Fushë Krujë.
Ky shtetas ishte shpallur në kërkim në vitin 2012, për veprat penale “Armëmbajtje pa leje” dhe “Heqja paligjshme e lirisë”.
Grupi hetimor ndodhet në vendngjarje dhe po punon për zbardhjen e ngjarjes.
Materialet do t’i kalojnë Prokurorisë së Rrethit Gjyqësor Krujë, për veprime të mëtejshme.
NGJARJA E 2 PRILLIT 2014:
Ndërkohë në vitin 2014, Klevis Balloku ka marrë peng familjen e vet e si pasojë, vëllai i tij Gentian Balloku e ka plagosur 27-vjeçarin me armë.
Ngjarja kishte ndodhur rreth orës 22:00 të mbrëmjes në Vinjollë të Laçit. Klevis Balloku, i plagosur me armë zjarri, ishte dërguar në gjendje të rëndë në Spitalin Ushtarak në Tiranë.
Më herët, i riu kishte marrë peng familjen e vet. Për këtë ai ishte dënuar me vetëm 6 muaj burg pasi gjykata e kishte nxjerrë me problemet mendore.
Autori i plagosjes së Klevis Ballokut ishte pikërisht vëllai i tij Gentian Balloku dhe dyshohet se arsyeja e plagosjes ishte marrja peng e familjes.
Gjithashtu edhe në vitin 2012 Klevis Balloku ka qenë i dënuar me 3 vite burg në Greqi.
Pas mbarimit të dënimit në Greqi, Balloku u kthye në Shqipëri, ku u kap në flagrancë nga policia me 26 kile drogë, armë e municione./GazetaReforma.com/
