Lideri i PSD-së në Kosovë, njëherësh edhe bashkëshorti i ish-ministres së Arsimit Besa Shahini u lirua këtë të shtunë nga paraburgimi, pas arrestimit në Kosovë një ditë më parë. Lajmin e ka bërë të ditur vetë Dardan Molliqaj me anë të një postimi në rrjetet sociale, ndërkohë që mediat kosovare shkruajnë se Molliqaj është liruar pas presionit të madh publik. Gjithashtu më anë të një deklarate për mediat në Kosovë zyrtarja e PSD-së, Natyra Kuçi është shprehur se përndjekja e pushtetit ndaj opozitës nuk i ndal kritikat dhe protestat.
“Pas presionit të madh publik, është liruar nga burgu kryetari i PSD-së Dardan Molliqaj. Kundërshtimi ndaj zhvatjes që ka filluar pushteti nuk ndalet. Përndjekja e pushtetit ndaj opozitës nuk e ndal kritikën e aksionin. Së bashku mund të krijojmë të renë demokratike si kundërpërgjigje ndaj autoritarizmit të Kurtit”, tha Kuçi.
Molliqaj ka reaguar edhe përmes një postimi në rrjetet sociale, pas arrestimeve me dhunë të zyrtarëve të PSD-së, të cilët u ngritën në protestë për tiketat ngjitëse prej 5 eurosh për regjistrimin e automjeteve.
Molliqaj tha se dhuna e policisë nuk erdhi nga aksioni i PSD-së, por nga cënimi i integritetit moral e politik të një qeverisjeje zhvatëse.
“Plaçkitja ndaj qytetarëve nuk kaloi pa u dalluar. Investimin në imazhin e superioritetit moral e mori lumi. Dhuna policore vjen prej një sistemi të vjetër që ushqehet edhe nga rendi patriarkal. Janë po këta policë që nuk reagojnë ndaj dhunës së përditshme ndaj qytetarëve pa mbrojtje e mbështetje nga shteti. Por policia është reflektim. Ajo merr yrush nga politika. E kur në pushtet liderët populist bëjnë kontabilitetin e numrave, tek policia përkthehet në zhvleftësim të jetës së qytetarit. Bashkëjetesa e patriarkatit me populizmin u pa dje me zë e me figurë”, shkroi Molliqaj.
Sjellim në vëmendje se ditën e djeshme, Molliqaj së bashku me 7 zyrtarë të tjerë të Partisë Social Demokrate u arrestuan pasi u ngritën në protestë përpara së Drejtësisë.
