Ish-gjyqtarit Shkëlqim Miri, i cili u dënua me 2.8 vite burg për korrupsion në favorizimin e një të dënuari për veprën penale të vrasjes me dashje dhe armëmbajtje pa leje, kundrejt kërkimit dhe marrjes së përfitimeve monetare të paligjshme, i është ulur dënimi nga gjykata e apelit.
Apeli e ka ulur dënimin nga 2.8 vite burg në 2 vite. Mësohet se Mirit i është llogaritur si paraburgim koha nga arrestimi deri më sot duke bërë që së shpejti të dalë i lirë.
Ai pritet të lirohet përfundimisht brenda 15 ditësh.
Ndalimi i tij u krye në funksion të procedimit penal proaktiv të vitit 2017, për veprat penale të “Korrupsionit aktiv të gjyqtarit, prokurorit dhe funksionarëve të tjerë të drejtësisë”, “Korrupsionit pasiv të gjyqtarëve, prokurorëve dhe funksionarëve të tjerë të organeve të drejtësisë”
Gjatë kontrollit në banesë, me vendim të Gjykatës së Shkallës së Parë për Krimet e Rënda, të kryer nga strukturat e Hetimit të Korrupsinit në Policinë e Shtetit, u gjetën dhe u sekuestruan në cilësinë e provës materiale 174,810 euro; 10,149,000 lekë dhe 1,000 dollarë, që dyshohet të jenë marrë si ryshfet për një vendim favorizues për Gentian Dodën i akuzuar për vrasjen e dy personave në Burrel, në vitin 1997. Nga hetimi proaktiv nga Krimi Ekonomik dhe Prokuroria e Krimeve të Rënda, ka dyshime se gjyqtari ka marrë lekë për këtë ndryshim akuze, nga vrasje, në plagosje të rëndë me dashje.
