Gjatë orëve të para të mëngjesit të djeshëm u shemb godina e Teatrit Kombëtar, ku pati përplasje të njëpasnjëshme gjatë ditës mes Policisë dhe protestuesëve. Në Polici janë shoqëruar dhjetëra aktivistë, aktorë e figura të opozitës, teksa kjo e fundit ka paralajmëruar për aksion opozitar.
Në 16:30 nisi protesta mbarëkombëtare e thirrur nga Alenca për Mbrojtjen e Teatrit ndërsa Policia gjatë gjithë ditës së sotme është përgatitur dhe ka blinduar me efektivë të gjithë zonën, ku do zhvillohet protesta. Lleshaj paradite zhvilloi një takim me drejtuesit e Policisë ku ka dhënë urdhër që të jenë mbi 1000 efektivë në protestë.
Tashmë kanë nisur tensionet në turmën e protestuesve, pasi janë hedhur kapsolla dhe janë dëgjuar dy shpërthime.
Më pas mbi turmë është ngritur një re tymi, teksa nga podium po flasin me radhë artistë dhe qytetarë, të cilët kanë bërë thirrje për qetësi dhe për të larguar provokuesit nga turma.
Më pas protestuesit kanë larguar një person mes përmes turmës duke ia mbajtur kokën poshtë, teksa raportohet se një grua është lënduar.
Më herët disa protestuesë u qëlluan me njëri-tjetrit dhe në këtë moment, disa metra larg tyre, ndodhej edhe kreu i Partisë Demokratike, Lulzim Basha.
Pas shpinës së tij, protestuesit nuk i kursyen grushtat, teksa sipas Dosja.al sherri ka ndodhur mes aktivistëve të Lëvizjes Vetëvendosje në Tiranë dhe militantëve të Partisë Demokratike, pasi VV ka kundërshtuar praninë e Bashës në protestë.
Sakaq, ditën e sotme ish-kryeministri Sali Berisha ka shkuar në protestën, teksa është fotografuar mes turmës, me një maskë të vendosur.
I rrethuar nga simpatizantët, të gjithë me dy gishtat lart kanë mbështetur ish-kryeministrin, i cili mungoi ditën e djeshme.
