Policia e Himarës, së bashku me disa pushues që ndodheshin në zonë, iu përgjigjën menjëherë thirrjes për ndihmë të një turisteje spanjolle që kishte rënë dhe kishte marrë dëmtime në kokë pranë plazhit të Filikurit.
Rreth orës 16:00, Salla Operative informoi patrullën e Komisariatit të Policisë Himarë për incidentin, dhe forcat e rendit u nisën drejt vendit të ngjarjes.
Aty, ata bashkë me pushuesit ndihmuan turisten e bllokuar, duke e nxjerrë dhe më pas e shoqëruan me ambulancë drejt Qendrës Shëndetësore në Himarë, ku aktualisht ndodhet nën kujdesin e mjekëve.
Policia e Himarës shpreh mirënjohjen ndaj qytetarëve që u treguan solidarë dhe thekson gatishmërinë e vazhdueshme për të reaguar dhe ofruar ndihmë në çdo situatë emergjente, duke siguruar sigurinë dhe mirëqenien e banorëve dhe vizitorëve.
