Tuneli i Llogarasë po bëhet gati për ndërtim, por ‘loja’ po bëhet edhe për administrimin e tij.
Vetë Ministrja e Infrastrukturës dhe Energjisë, Belinda Balluku, e pati deklaruar se kalimi në tunel do të bëhet me pagesë, për të gjithë ata që do e përdorin dhe do kalojnë aty.
Burime për ‘Gazeta Reforma’, bëjnë me dije se vetë Samir Mane, do jetë pas kompanisë që do marrë administrimin e tunelin pas mbarimit.
Zërat thonë se në tunelin 6 kilometra, nga Orikumi në Palasë, që do mund të bëhet brenda 10 minutave, nuk do paguajnë të gjithë ata që ndalesën e kanë tek resorti i Manes.
Ndërkohë, të gjithë të tjerët, do u nënshtrohen taksës për përdorimin e tunelit.
Selektivitet i pastër dhe i hapur ky, e mbështetur nga vetë qeveria për oligarkët që vijojnë të pasurohen.
Miqtë e qeverisë, fitues të projektit
Bashkimi i operatorëve ekonomikë iC Consulenten Ziviltechniker GESmbh, kompani inxhinierike e regjistruar në Austri, ELEA iC d.o.o dhe IBE d.d svetovanje, projektiranje in inzeniring – kompani inxhinierike regjistruar në Slloveni, dhe SEED Consulting sh.p.k. dhe “InfraKonsult” sh.p.k., kompani lokale, është përzgjedhur si kompania fituese për projektin e metodologjisë për ndërtimin e Tunelit të Llogarasë.
SEED Consulting sh.p.k – e themeluar në vitin 2014, është një kompani që administrohet nga Alban Eftihimi dhe Ylli Gjoni, si dhe ka për aksionarë Andi Eftihimin, Alban Eftihimi, Altin Premtin, Olsi Eftihimin dhe Ylli Gjonin.
Të gjithë këto janë bashkëortakë dhe në kompani të tjera si ATELIER 4, Eco Point Albania, Seed Consulting dhe Technical Building Solutions.
Alban Efthimi njihet si miku i Edi Ramës dhe kompania “Atelier 4” si e preferuara e kreut të qeverisë e Bashkisë Tiranë. Shumë projekte në vend, që pas vitit 2013 mbajnë vulën e Atelier 4.
Me siguri as kësaj here nuk është e rastësishme që kompania ku Alban Eftihimi është aksioner e administrator, të jetë pjesë e konsorciumit fitues për Tunelin e Llogarasë.
/GazetaReforma.com/
