‘Tumo Center’ ose një “qendër informatike për programime” gjoja për fëmijët dhe adoleshentët, është “goli” i radhës në dy porta i kryebashkiakut të Tiranës, Erion Veliaj.
Jo më larg se sot vet kryebashkiaku Veliaj, deklaroi publikisht marrjen me qira (për zyra) të ambienteve të qendrës tregtare që qeveria ka ndërtuar mbi ish-stadiumin kombëtar “Qemal Stafa” sot i quajtur “Air Albania”.
Qendra e re tregtare që ka qindra metra katror bosh, ishte në “hall” për të lëshuar ambientet me qira dhe duket se Veliaj, i ka gjetur “zgjidhjen” krizës së kompanisë që menaxhon këtë qendër.
Në ambientet tregtare të “Air Albania” , Bashkia e Tiranës do të vendosë për një afat të pacaktuar “inkubatorin” e saj të madh të teknologjisë së inovacionit, artit dhe kulturës.
Kjo do të jetë deri në kohën kur qendra e përcaktuar për këtë qëllim, Piramida, do të rikonstruktohet nga një tjetër mik i kryebashkiakut Veliaj, kompania “Fusha” me një fond që kap miliona euro.
Qiraja te “Air Albania”
Sot kryetari i Bashkisë së Tiranës, Erion Veliaj, dhe dy bashkëdrejtuesit e Fondacionit Shqiptaro-Amerikan të Zhvillimit, Martin Mata dhe Aleksandër Carapuli, inspektuan punimet e fundit që po bëhen tek “Tumo Center”, në mjediset e stadiumit kombëtar “Air Albania”, e cila do të presë mijëra të rinj të moshës 12-18 vjeç, që do të mësojnë gjuhën e kodimit.
Pasi reklamoi “zgjidhjen” e krisës së qiraxhinjve për miqtë e tij te “Air Albania”, Veliaj tha se po këtë muaj, nisin punimet për transformimin e Piramidës, që sipas tij, do të jetë shtëpia e përhershme e projektit “Tumo Center”.
Sipas Veliajt, punimet për rikonstruksionin dhe ripërshtatjen e Piramidës në një qendër të madhe rekrutimi për të rinj që do t’i shërbejnë interesave të kryebashkiakut dhe onturazhit të tij, do të zgjasin rreth një vit e gjysmë.
Veliaj shtoi se, ky investim përkon edhe me idenë për ta kthyer stadiumin “Air Albania” në një qendër multifunksionale.
Sipas Veliajt, të rinjtë që do të frekuentojnë mjediset e transformuara të Piramidës do të kenë mundësi të ndjekin kurse të ndryshme në fushën e IT dhe të komunikacionit, si dizajni, programimi etj.
‘Goli’ i Veliajt me Piramidën dhe ‘Fushën’
I konsideruar nga opinioni publik dhe politika si një ndër “oligarkët” më të mëdhenj të punëve publikë në vend, sidomos në bashkinë Tiranë, sipërmarrësi Shkëlqim Fusha, administrator dhe pronar i firmës “FUSHA Sh.P.K.”, do të jetë i “përzgjedhuri” i Veliajt dhe bashkisë së tij, për të “rilindur” Piramidën.
Firma dhe pronari i saj Shkëlqimi, kanë fituar në 6 vitet e fundit, jo pak por shifrën marramendëse prej rreth 91 milionë eurosh tenderë nga “Rilindja”, e sidomos nga Erion Veliaj.
Por duket se ky i fundit, po i jep “Fushës” thuajse “llokmën” më të madhe të punëve publike në kryeqytet, projektin e rikonstruksionit të Piramidës.
“GazetaReforma.com” ka mësuar se bëhet fjalë për një shumë rreth 12 milionë eurosh ose rreth 1,500,000,000 lekë të reja me TVSH.
Procedura në fjalë mban numrin e referencës: “REF-67456-07-30-2020” dhe ka fond limit vlerën prej 1,694,847,651.25 lekë (të reja) pa TVSH.
Tenderi është hapur në datë 03.08.2020 dhe është mbyllur në datë 09.09.2020. Zyrtarisht fituesi nuk është shpallur ende dhe gjithashtu as nuk është publikuar në faqet përkatëse të prokurimeve.
Por sipas burimeve, tashmë gjithçka është përcaktuar dhe ka marrë fund dhe duket se Shkëlqim Fusha, do të jetë “rilindasi” i ish-muzeut të Diktatorit Hoxha, e njohur nga të gjithë si Piramida.
/GazetaReforma.com/
