Trupat e Gardës Kombëtare kanë filluar të dislokohen në Uashington DC me urdhër të presidentit Donald Trump, pas shpalljes së një “emergjence të sigurisë publike” të hënën.
Trump deklaroi se po nis një fushatë të gjerë “pastrimi” për të luftuar kriminalitetin dhe për të larguar personat e pastrehë nga rrugët e kryeqytetit amerikan.
Sipas njoftimit të tij, 800 trupa të Gardës Kombëtare do të bashkohen me qindra oficerë federalë të zbatimit të ligjit, të vendosur në qytet që gjatë fundjavës.
“Po përballemi me një situatë paligjshmërie të plotë dhe totale,” tha Trump për gazetarët në Shtëpinë e Bardhë.
Ndërkohë, kryetarja e bashkisë së Uashingtonit, Muriel Bowser, ka kundërshtuar deklaratat e presidentit, duke i cilësuar të pasakta.
Ajo theksoi se ndonëse pati një rritje të kriminalitetit në vitin 2023, statistikat tregojnë një rënie të ndjeshme prej atëherë, me krimin e dhunshëm në nivelin më të ulët të 30 viteve të fundit.
