Ka përfunduar dy orë më parë te Krimet e Rënda seanca ndaj ish-ministrit të Brendshëm, Saimir Tahiri, i cili ka dalë i qeshur nga gjykata.
Trupa gjykuese është tërhequr dhe pritet të dalë me një vendim final në orën 16:00, shkruan “Balkanweb”.
Gjatë seancës sotme Tahiri e ka bërë sërish mbrojtjen vetë, ndërsa ka paraqitur edhe një foto me kryeministrin Edi Rama.
Duke iu referuar përgjimeve ndaj Habilajve, ish-shefi i Ministrisë së Brendshme tha se në politkë Rama është shefi i madh.
Më tej ish-ministri ka hedhur poshtë pretendimet se shefi i madh është ai apo Rama, duke thënë se gjatë kohës kur trafikantët bisedojnë me njëri-tjetrin, ai dhe kryeministri ndodheshin në takime.
Në të njëjtën kohë Tahiri përçoi edhe disa mesazhe të koduara për anëtarët e qeverisë, duke u shprehur se nuk kanë parë gjë akoma.
Gjithashtu ish-ministri shigjetoi edhe pasardhësin e tij, Fatmir Xhafaj.
Sipas Tahirit, ai gjykohet për një makinë që ia ka shitur Habilavje, ndërsa të tjerë kanë vëllezër trafikantë e nuk mbajnë përgjegjësi.
Në fund ish-ministri ka kujtuar edhe bombën e vendosur në farmacinë e babait të tij në Tiranë.
Për Tahirin prokuroria ka kërkuar 12 vjet heqje lirie, të cilat do të reduktohen në 8 vite, si pasojë e gjykimit të shkurtuar.
