Presidenti i SHBA-së, Donald Trump, deklaroi se homologu i tij ukrainas, Volodymyr Zelensky, mund të jetë i gatshëm t’i dorëzojë Krimenë Rusisë si pjesë e një marrëveshjeje paqeje, megjithëse Kievi ka kundërshtuar vazhdimisht një zgjidhje të tillë.
I pyetur nga gazetarët nëse mendonte që Zelensky është i gatshëm të dorëzojë gadishullin e aneksuar nga Rusia në vitin 2014, Trump u përgjigj: “Unë mendoj se po”.
Komentet ai i bëri pas kthimit nga Vatikani, ku pati një takim të shkurtër me presidentin ukrainas, përpara funeralit të Papa Françeskut. Sipas Trump, biseda me Zelenskyn ishte “pozitive” dhe përfshiu edhe një diskutim të shkurtër mbi çështjen e Krimesë.
Ai shtoi se Zelensky i la përshtypjen e një qëndrimi më të qetë, ndryshe nga tensionet e mëparshme gjatë takimit të tyre në Zyrën Ovale.
Nga ana e saj, Ukraina ka theksuar në mënyrë të përsëritur se nuk do të bëjë lëshime territoriale pa u arritur më parë një armëpushim, duke këmbëngulur se integriteti territorial nuk mund të jetë pjesë e negociatave fillestare.
Deri tani, as Zelensky dhe as presidenti rus Vladimir Putin nuk kanë reaguar ndaj deklaratave të fundit të Trump.
Ndërkohë, ministri gjerman i Mbrojtjes, Boris Pistorius, paralajmëroi Kievin të mos pranojë marrëveshje që përfshijnë dorëzim territori në këmbim të paqes. Në një intervistë për ARD, ai e konsideroi propozimin e përfolur të Trump si një “kapitullim” të papranueshëm për Ukrainën.
Javën e kaluar, Trump deklaroi se “për pjesën më të madhe të pikave kryesore të marrëveshjes është arritur një dakordësi”, ndërsa raportet sugjerojnë se Ukrainës mund t’i kërkohet të heqë dorë nga territore të mëdha të pushtuara nga Rusia, përfshirë edhe Krimenë.
