Tarifat më të larta të vendosura nga Presidenti i SHBA-së, Donald Trump, për rreth 60 vende që eksportojnë në Amerikë kanë hyrë në fuqi, duke përfshirë një tarifë prej 104% për shumicën e mallrave kineze.
Ky zhvillim ndodh pas një periudhe tarifore të mëparshme, ndërsa Pekini nuk ka dhënë ende një përgjigje formale, megjithatë mediat shtetërore kineze theksojnë se Kina “nuk ka frikë” dhe është e gatshme të “luftojë deri në fund”.
Alfredo Montufar-Helu, këshilltar i lartë i Qendrës Kineze në “The Conference Board”, paralajmëroi se ky ngërç mund të sjellë pasoja afatgjata për ekonominë globale.
Ai theksoi se nuk është e qartë se si SHBA do të sigurojë furnizim alternativ për mallrat kineze në një kohë kaq të shkurtër.
Përkundër këtyre vështirësive, ndjenjat anti-Trump janë shtuar në rrjetet sociale kineze, ku shumë postime përshkruajnë mbështetje për qëndrimin e qeverisë kineze dhe vullnetin për të luftuar me çdo kusht.
Një postim i njohur thotë: “Kjo është një luftë financiare pa tym. Ne nuk duhet të friksohemi. Duhet të luftojmë deri në fund dhe të tregojmë forcën e popullit kinez.”
Përveç Kinës, tarifa të larta janë aplikuar edhe ndaj disa vendeve të tjera të Azisë, përfshirë aleatët e SHBA-së si Japonia, Tajvani dhe Koreja e Jugut.
