Presidenti amerikan Donald Trump ka sinjalizuar një zbutje të mundshme të qëndrimit të tij në përplasjen tregtare me Kinën, duke deklaruar se tarifat e vendosura ndaj produkteve kineze do të bien ndjeshëm, por nuk do të eliminohen plotësisht.
Gjatë një aktiviteti në Shtëpinë e Bardhë, Trump e cilësoi nivelin aktual të tarifave si të papërballueshëm.
“145% është shumë. Do të bjerë ndjeshëm, por nuk do të jetë zero,” tha ai, duke ndryshuar tonin pas një periudhe tensionesh të larta me Pekinin.
Deklaratat e tij erdhën pas komenteve të Sekretarit të Thesarit, Scott Bessent, në një konferencë të organizuar nga JP Morgan Chase, ku ai kritikoi përshkallëzimin e konfliktit dhe ndikimin e tij negativ në shkëmbimet ekonomike mes dy fuqive.
Bessent parashikoi një zbutje të afërt të tensioneve dhe theksoi se objektivi nuk është shkëputja, por rivendosja e një ekuilibri në marrëdhëniet tregtare.
Këto sinjale të reja u reflektuan menjëherë në tregjet financiare, indekset kryesore në Wall Street shënuan rritje, ndërsa bursat aziatike u përfshinë nga optimizmi Hang Seng u rrit me 2.5%, Nikkei 225 me 2%, dhe Kospi me 1.5%.
Në sfondin e kësaj zbutjeje të retorikës, përballja mes dy vendeve ka vijuar me shkëmbim masash ndëshkuese. SHBA ka rritur ndjeshëm tarifat për produktet kineze, ndërsa Kina ka reaguar me tarifa deri në 125% për mallrat amerikane dhe masa të tjera hakmarrëse, përfshirë ndalimin e disa kompanive amerikane dhe kufizime ndaj eksporteve të mineraleve strategjike.
Sektorë të ndjeshëm amerikanë si kinematografia dhe aviacioni janë goditur veçanërisht: filmat e Hollivudit janë larguar nga repertori kinez, ndërsa avionë të kompanisë Boeing janë kthyer pas në SHBA.
Megjithatë, Trump ka mbajtur një qasje më personale ndaj homologut të tij kinez, Xi Jinping.
“Kam një marrëdhënie të mirë me Xi,” tha ai, duke lënë të hapur mundësinë e një marrëveshjeje. Kur u pyet nëse pandemia do të përmendej në tryezën e bisedimeve, ai tha se “do të jemi shumë të mirë edhe ata do të jenë shumë të mirë dhe do të shohim se çfarë do të ndodhë”.
Pekini, nga ana e tij, ka theksuar se është i gatshëm për bisedime, por vetëm mbi bazën e barazisë dhe respektit të ndërsjellë. Një burim i afërt me qeverinë kineze bëri të ditur se autoritetet në Kinë janë të shqetësuara për mungesën e qartësisë në komunikim nga pala amerikane.
Reagime të ashpra ka pasur edhe ndaj disa deklaratave të zyrtarëve amerikanë, përfshirë nënpresidentin JD Vance, të cilat janë konsideruar fyese nga publiku dhe mediat kineze.
