Presidenti i Shteteve të Bashkuara të Amerikës, Donald Trump, firmosi një urdhër ekzekutiv për vendosjen e sanksioneve ndaj Gjykatës Ndërkombëtare Penale me seli në Hagë, Holandë.
Ky vendim u mor me arsyetimin se, sipas Trump, Gjykata ka ndërmarrë veprime të pabaza dhe të paligjshme kundër SHBA-së dhe aleatit të saj, Izraelit.
Në urdhrin e shpërndarë nga Shtëpia e Bardhë, theksohet se GJNP ka abuzuar me fuqinë e saj, duke kërkuar një mandat arresti për Kryeministrin izraelit, Binyamin Netanyahu.
Sanksionet e vendosura përfshijnë ngrirjen e pasurive dhe ndalimin e udhëtimit për zyrtarët e GJNP-së, punonjësit dhe anëtarët e familjeve të tyre, si dhe për këdo që dyshohet se ka ndihmuar hetimet e gjykatës.
Emrat e individëve të prekur nga këto masa nuk u bënë menjëherë publikë, por më parë administrata Trump ka vendosur sanksione të ngjashme ndaj prokurorëve dhe gjyqtarëve të GJNP-së.
