Qeveria amerikane ka përjetuar një nga periudhat më të vështira me mbylljen e qeverisë, por mesa duket situata ka ndryshuar. Mbyllja e gjatë ka përfunduar këtë të premte, në kohën kur Trump ka shtyrë kërkesën e tij për financimin e një muri përgjatë kufirit mes Shteteve të Bashkuara dhe Meksikës, duke nënshkruar një ligj financimi tre-javor për rihapjen e agjencive qeveritare dhe për rikthimin në punë të 800 mijë punonjësve federalë.
Mbrëmjen e djeshme, zyra për Menaxhimin e Buxhetit i ka dërguar një memorandum të gjitha agjencive të mbyllura federale për t’i informuar se tashmë janë të hapura dhe punonjësit mund të rifillojnë aktivitetin normalisht.
Sipas korrespondentes së Zërit të Amerikës, Katherine Gypson, financimi afatshkurtër synon t’u japë kohë ligjvënësve të trajtojnë çështjen e sigurisë kufitare.
E premtja shënoi edhe rrogën e dytë të humbur për punonjësit federalë, pas dy përpjekjeve të dështuara të Senatit për të rihapur qeverinë.
Ky akumulim problemesh detyroi Presidentin Trump të rihapë qeverinë deri më datën 15 shkurt, por pa një financim për murin kufitar.
“Gjatë 21 ditëve të ardhshme, pres që si demokratët edhe republikanët do të veprojnë në mirëbesim. Kjo është një mundësi për të dyja palët të punojnë së bashku për të mirën e kombit tonë të pacënuar, të bukur dhe të mrekullueshëm”, tha Presidenti Trump, shkruan Zëri i Amerikës.
