Një gjykatës në Nju Jork ka urdhëruar që Donald Trump të dënohet më 10 janar për çështjen e pagesave të fshehta, vetëm dy javë përpara se ai të betohet si president.
Gjykatësi Juan Merchan bëri të qartë se Trump nuk do të përballej me burgim, gjobë ose kushte të tjera, por do të merrte një “lirim të pakushtëzuar”.
Trump mund të paraqitet personalisht ose virtualisht në seancën dëgjimore.
Ish-presidenti kishte kërkuar që çështja të pushohej pas fitores së tij në zgjedhjet presidenciale, duke e quajtur vendimin një “sulm politik të paligjshëm”.
Në mediat sociale, Trump e cilësoi rastin si “një paradë të manipuluar” dhe deklaroi se rasti synonte të dëmtonte fushatën e tij të vitit 2024.
Në maj, Trump u shpall fajtor për 34 akuza për falsifikim të të dhënave financiare, të lidhura me një pagesë prej 130,000 dollarësh ndaj yllit të filmave për të rritur, Stormy Daniels.
Pagesa ishte bërë nga ish-avokati i tij, Michael Cohen, për të mbuluar një aferë të supozuar seksuale gjatë fushatës zgjedhore të vitit 2016. Trump ka mohuar çdo keqbërje dhe është deklaruar i pafajshëm.
Në një postim në platformën e tij “Truth Social”, Trump tha se urdhri i gjyqtarit ishte “në kundërshtim me Kushtetutën” dhe paralajmëroi se vendimi, nëse qëndron, do të shënojë “fundin e Presidencës siç e njohim”.
Zëdhënësi i tij, Steven Cheung, e quajti vendimin pjesë të një “gjueti shtrigash” dhe tha se Trump duhet të lejohet të vazhdojë tranzicionin presidencial pa pengesa. Cheung shtoi: “Presidenti Trump do të vazhdojë të luftojë këto mashtrime deri në fund”.
