Kreu i Shtëpisë së Bardhë, Donald Trump, së fundmi ka dhënë një konferencë për shtyp, ku ka folur rreth situatës së COVID-19 në SHBA, si edhe për mjekimet e mundshme ndaj virusit të rrezikshëm.
Ai bëri me dije se një mjekim i cili shërben kundër malarias ka dhënë rezultat për sa i përket Coronavirusit, por shtoi se po punohet intensivisht për të gjetur vaksinën e duhur dhe po bëhet gjithçka për qytetarët.
“Po punohet pa pushim për të gjetur vaksinën e duhur. Kemi miratuar mjekime të reja, disa opsione për covid-19, dhe ky është një sukses. Do mblidhen të dhëna për mjekime që funksionojnë. E drejta për të provuar barna të reja është sukses. Me mjekimet e reja mendoj se do ndryshojë gjithçka. Një mjekim për malarian ka dhënë rezultate. Po bëjmë gjithçka të mundemi për qytetarët tanë. Ju bëj thirrje të qendrojmë bashkë me zemër, por të kujdeseni për veten dhe të qendroni në shtëpi. Jemi në një luftë të madhe, jo financiare, por ekonomike, dhe që duhet ta fitojmë sepse është shumë e rëndësishme”.
Disa ditë më parë në Shtetet e Bashkuara të Amerikës nisi testimi i një vaksine që mund të luftojë COVID-19, që do testohet edhe te vullnetarët e tjerë për të parë rezultatet, përpara se të jetë e gatshme për t’u përdorur te pacientët me Covid-19, çka mund të kërkojë nga 8 muaj deri në 1 vit kohë.
Megjithatë, kjo nuk është vaksina e parë, qindra kompani në SHBA dhe botë po punojnë për zhvillimin e një vaksine që do të luftojë Coronavirusin.
Numri total i viktimave në rang botëror deri tani është 9, 377 persona dhe janë 228,687 të infektuar në 177 vende, teksa në Kinë në 24 orët e fundit për herë të parë që nga shpërthimi i virusit nuk është shënuar asnjë i infektuar.
Deri tani në vendin tonë kanë humbur jetën 2 persona dhe janë infektuar 64 të tjerë, teksa në Kosovë janë 20 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
