Presidenti Donald Trump mbajti fjalimin e tij të parë para Kongresit në mandatin e dytë, duke e nisur me deklaratën se “Amerika është rikthyer”, çka u shoqërua me brohoritjet e ligjvënësve republikanë.
Ai theksoi se administrata e tij ka bërë hapa të rëndësishëm që nga nisja e mandatit, duke përmendur si shembull nënshkrimin e 76 urdhrave ekzekutivë në vetëm 43 ditë, një shifër që sipas tij tejkalon arritjet e administratave të mëparshme brenda katër apo tetë viteve.
Mirëpo, fjalimi nuk kaloi pa tensione. Vetëm pak minuta pasi kishte nisur, ai u ndërpre nga zhurmat dhe kundërshtimet e ligjvënësve demokratë.
Situata u përshkallëzua kur kryetari i Dhomës së Përfaqësuesve, Mike Johnson, urdhëroi nxjerrjen nga salla të kongresmenit demokrat Al Green, i cili përfaqëson Teksasin.
Pas largimit të tij, Presidenti Trump vijoi fjalimin, duke renditur disa nga vendimet kryesore të administratës së tij.
Ai u ndal veçanërisht te politika e tij e emigracionit, duke shpallur emergjencë kombëtare në kufirin jugor dhe vendosjen e ushtrisë për të patrulluar zonën, duke e quajtur këtë një masë për të ndaluar “pushtimin e vendit”.
Gjithashtu, Trump njoftoi pezullimin e menjëhershëm të ndihmave për vendet e huaja dhe kufizimin e punësimeve në administratën federale.
Një tjetër pikë e rëndësishme e fjalimit të tij ishte tërheqja e Shteteve të Bashkuara nga disa organizata dhe marrëveshje ndërkombëtare, përfshirë Marrëveshjen e Parisit për Klimën, Organizatën Botërore të Shëndetësisë dhe Këshillin e OKB-së për të Drejtat e Njeriut, të cilat ai i cilësoi si të padrejta dhe të korruptuara.
Presidenti Trump shfrytëzoi këtë platformë për të mbrojtur disa nga vendimet e debatueshme të qeverisë së tij, si shkurtimi i punonjësve federalë dhe përplasja me Presidentin ukrainas Volodymyr Zelenskyy. Por sfida më e afërt për të mbetet miratimi i buxhetit federal para datës 14 mars, kur skadon financimi aktual.
Republikanët janë të ndarë mbi disa çështje kyçe, përfshirë shkurtimin e programeve sociale si Medicaid, uljen e borxhit dhe të ardhmen e paketës së shkurtimit të taksave të miratuar në 2017. Trump ka bërë thirrje për një “ligj të madh dhe të bukur” për të siguruar fondet e nevojshme për axhendën e tij.
Nga ana tjetër, demokratët kanë kundërshtuar ashpër këtë plan, duke argumentuar se ai favorizon të pasurit në dëm të të moshuarve, fëmijëve dhe personave me aftësi të kufizuara.
“Ky është një grabitje e hapur ndaj më të dobëtëve, për të pasuruar më të pasurit,” u shpreh kreu i pakicës demokrate në Senat, Chuck Schumer.
Në vazhdim, mbetet për t’u parë nëse Presidenti Trump do të arrijë të sigurojë mbështetjen e nevojshme për ta çuar përpara axhendën e tij “Amerika e Para” apo nëse do të përballet me pengesa të mëdha nga opozita dhe brenda vetë partisë së tij.
