Presidenti amerikan Donald Trump njoftoi të martën mbrëma se Izraeli ka rënë dakord, në parim, me kushtet e një armëpushimi 60-ditor në Rripin e Gazës.
Përmes një postimi në rrjetin Truth Social, Trump bëri të ditur se gjatë kësaj periudhe do të punohet me të gjitha palët për të gjetur një zgjidhje të qëndrueshme për konfliktin.
Ai vuri në dukje se përfaqësuesit e tij kanë zhvilluar një takim të gjatë dhe produktiv me zyrtarë izraelitë, ndërsa theksoi ndërmjetësimin e Katarit dhe Egjiptit në proces, të cilët pritet të paraqesin një propozim përfundimtar për marrëveshjen.
“Shpresoj që Hamasi ta pranojë këtë marrëveshje, sepse situata nuk do të përmirësohet – do të përkeqësohet vetëm,” paralajmëroi Trump.
Ndërkohë, Ministri izraelit i Çështjeve Strategjike, Ron Dermer, ka informuar të dërguarin amerikan në Lindjen e Mesme, Steve Witkoff, se Izraeli është i gatshëm të hyjë në negociata të drejtpërdrejta me Hamasin për finalizimin e marrëveshjes së armëpushimit dhe lirimin e pengjeve, sipas një zyrtari të lartë izraelit.
Më herët të martën, Trump u shpreh për mediat se pret që marrëveshja të konkretizohet brenda javës së ardhshme, përpara vizitës së kryeministrit izraelit Benjamin Netanyahu në Shtetet e Bashkuara.
