Zëvendëspresidenti amerikan, J.D. Vance, zhvilloi sot një takim në Vatikan me Papën Leonin XIV, i cili mban njëkohësisht titullin historik si Papa i parë amerikan në krye të Kishës Katolike Botërore.
Gjatë audiencës, Vance i dorëzoi Atit të Shenjtë një ftesë zyrtare për të vizituar Shtetet e Bashkuara, në emër të Presidentit Donald Trump dhe Zonjës së Parë Melania Trump.
Zëdhënësja e Shtëpisë së Bardhë, Karoline Leavitt, deklaroi se takimi u zhvillua në orët e paradites dhe e përshkroi atë si “të frytshëm dhe pozitiv”.
Sipas saj, presidenti Trump shpreson ta mirëpresë Papën në Uashington në një të ardhme të afërt.
Vizita e Vance merr një dimension të veçantë edhe për shkak të marrëdhënieve të mëparshme të tensionuara midis administratës Trump dhe Papës Françesku, veçanërisht në lidhje me politikat për emigracionin.
Në këtë sfond, letra personale që Vance i dorëzoi Papës Leonin XIV synon të rihapë një kanal dialogu dhe bashkëpunimi midis Vatikanit dhe Uashingtonit.
