Presidenti i Shteteve të Bashkuara, Donald Trump, ka paralajmëruar mundësinë e vendosjes së sanksioneve të reja ndaj Kinës, si pjesë e një strategjie më të gjerë për të ushtruar presion mbi vendet që vazhdojnë të bëjnë tregti me Rusinë.
Të mërkurën, Trump njoftoi se deri në fund të gushtit do të dyfishojë tarifat ndaj Indisë, duke i çuar ato në 50%, ndërsa akuzoi Nju Delhin për ndihmën që po i jep Moskës në konfliktin e Ukrainës, përmes blerjes së naftës ruse.
Gjatë një konference për shtyp në Shtëpinë e Bardhë, presidenti u pyet nëse do të aplikojë masa të ngjashme ndaj Kinës. Ai u përgjigj se kjo mund të ndodhë, në varësi të veprimeve që do të ndërmerren.
Për më tepër, Trump paralajmëroi se do të ketë tarifa shtesë dhe sanksione dytësore ndaj vendeve që blejnë energji nga Rusia.
“Do të vini re një rritje të numrit të tarifave dhe sanksioneve,” tha ai.
Nga ana e tyre, Nju Delhi dhe Pekini, dy nga importuesit më të mëdhenj të naftës ruse në botë, kanë bërë të qartë se do të mbrojnë interesat ekonomike të tyre pavarësisht kërcënimeve për tarifa të reja.
“India do të marrë të gjitha masat e nevojshme për të mbrojtur interesat kombëtare,” deklaroi Ministria e Jashtme indiane në një komunikatë zyrtare.
