Një ngjarje e rëndë është regjistruar në Nikël, ku persona ende të paidentifikuar kanë grabitur një banesë. Mësohet se banesa ishte e biznesmenit Nazim Çangu, i cili është dhunuar nga grabitësit mbrëmjen e djeshme në banesën e tij në Nikël të Fushë-Krujës.
Bëhet me dije se ngjarja e rëndë ka ndodhur rreth orës 1 të natës. Biznesmeni i cili ka një lokal në zonë dhe merret me bujqësi, ka rrëfyer se kanë qënë 10 persona ata të cilët iu janë futur në banesë me dhunë dhe i kanë marrë 100 mijë euro.
Po ashtu mësohet se familja ka qenë për darkë tek një mik dhe janë kthyer rreth orës 23:00 dhe rreth orës 01:00 të natës grabitësit kanë hyrë në banesë ku i kanë gjetur familjarët në gjumë.
Grabitësit kanë mbyllur në një dhomë gruan dhe katër fëmijët dhe më pas kanë marrë biznesmenin dhe e kanë rrahur, dhunuar dhe gjuajtur me qytën e armës duke e larë në gjak për t’i dhënë çelësin e kasafortës ku mbante paratë dhe sendet me vlerë. Vet biznesmeni thotë se i kanë prerë gishtat. Ai tregon se një nga grabitësit ka qenë i veshur si policë, ndërsa kasafortën e hapën me kaçavidë.
“I bëjë thirrje shtetit që të gjenden autorët, grabitësit më kanë prerë gishtin. Më dhunuan më lanë pa ndjejna. I thashë nuk e kam celësin e kasafortës. Njëri prej tyre ishte me uniformë policie. Kasaforten e hapën me kaçavida.”, ka thënë Nazmi Çangu.
