Një ngjarje e rëndë ka ndodhur në qytetin e Kavajës. Një 49-vjeçar ka tentuar t’i japë fund jetës duke u vetëhedhur nga lartësia.
Sipas policisë ngjarja ka ndodhur ditën e djeshme në Kavajë, ndërsa bëhet me dije se 49-vjeçari A.S ka qenë në gjendje të rënduar psikologjike.
“Në Kavajë, ditën e djeshme, në kushte të rënduar psikologjike, është vetëhedhur nga lartësia shtetasi A. S., 49 vjeç, i cili si pasojë e plagëve të marra ka ndërruar jetë në spital. Nga veprimet paraprake dyshohet se ky shtetas vuante nga depresioni”, njofton policia.
Kujtojmë se mëngjesin e sotëm ka ndërruar jetë dhe 57 vjeçari nga Ballshi, Pelivan Sinorrapaj.
Mësohet se shkak i ngjarjes së rëndë ishte një sherr banal mes 57 vjeçarit dhe shokëve të tij. Sinorrapaj u rrah barbarisht nga një grup personash me të cilët kishte konsumuar alkool. Shkak i sherrit në lokal midis tyre ishte një debat për çështje politike.
Ai u gjet i gjakosur dhe pa ndjenja nga kalimtarë të rastit në Ballsh. Ka qenë pasditja e datës 29 janar kur Pelivan Sinorrapaj, së bashku me tre shokët e tij Fitim Zekaj 42 vjeç, Festim Alimetaj 53 vjeç dhe Ferdinand Meraj 44 vjeç të tre banues në Ballsh Mallakastër, pasi kishin konsumuar alkool në një lokal në Ballsh, më pas kanë debatuar për pagesën e tavolinës.
