Deputeti i Partisë Demokratike (PD), Tritan Shehu, akuzoi ashpër “regjimin aktual” gjatë një fjalimi në Kuvend, duke thënë se ai ka frikë nga çdokush që denoncon korrupsionin dhe abuzimet. Shehu theksoi se regjimi izolon figura si Sali Berisha për shkak të kritikave dhe denoncimeve të tij të vazhdueshme.
Shehu përmendi edhe rastin e Ilirjan Muhaj, i cili është zgjedhur kryeplak në Katundisht (Këlcyrë), por i është mohuar ky post nga kryetari i Bashkisë dhe Këshilli i Këlcyrës. Sipas Shehut, regjimi ka frikë nga Muhaj sepse ai vazhdimisht denoncon korrupsionin lokal. “Kjo është paranoja juaj e frikës. Aty, në Libohovë, Lazarat, Gjirokastër etj. Dhe SPAK hesht. Por njerëzit nuk do heshtin. Ata po ngrihen për të përmbysur këtë regjim,” tha Shehu.
Deputeti i PD-së vuri në dukje se pavarësisht heshtjes së institucioneve si SPAK, qytetarët po organizohen dhe ngrihen kundër korrupsionit dhe padrejtësive të regjimit. Shehu u shpreh me bindje se populli do të vazhdojë të luftojë për drejtësi dhe transparencë në qeverisje.
