Prej fillimit të këtij viti, Agjencia Kombëtare e Shoqërisë së Informacionit ishte në kolaps të plotë. Ndonëse kishte tenderuar të paktën 72 milionë euro prokurime, AKSHI nuk kishte arritur të finalizonte dot as 10 për qind të tyre.
Arsyeja? Të gjithë tenderët ankimoheshin në Komisionin e Prokurimeve Publike nga dyshja e kompanive, Advanced Business Solutions dhe Datalog. Deri një javë më parë.
Cuditërisht në datën 13 gusht, Advanced Business Solutions u tërhoq nga të gjitha ankimimet e saj në proces, në Komisionin e Prokurimeve Publike. Madje dukë lëpirë edhe atë që kishte pështyrë vet sepse në disa ankimime akuzonte për tendera të paracaktuar.
Vendimi i beftë e la të gjithë tregun e IT-së të surprizuar, teksa shumë përpiqeshin të kuptonin se çfarë kishte ndodhur me Gerond Meçen, pronarin e ABS-së. A kishte arritur ai një marrëveshje, që i do t’i rihapte aksesin në tenderat e AKSHI-t, apo i kishin çuar haber? Gjërat do të bëheshin pak më të qarta vetëm fare pak ditë më vonë.
Gerond Meçe, pronar i ABS
Një ditë më parë, familja e ish zv/drejtorit të Përgjithshëm të AKSHI-t, denoncoi zhdukjen e tij. Për 10 orë, Daniel Shima mbeti i zhdukur, ndonëse e kërkonte e gjithë Shqipëria dhe lajmi kishte marrë dhenë në të gjitha mediat. Natën vonë, Shima u rikthye në shtëpi dhe i tha policisë se ishte zënë me të dashurën, dhe ishte zhdukur pa lënë gjurmë për të reflektuar.
Përgjithësisht në rast sherresh, ikin gratë nga shtëpia, por këtë herë qëlloi ndryshe dhe iku burri. Kohë çudirash e madje edhe rastësish të mëdha.
Daniel Shima dhe Gerond Meçe kanë punuar shumë bashkë. Deri në kohën, që Shima ishte numri dy i AKSHI-t dhe firmoste çdo procedurë prokurimi të këtij institucioni, Gerond Meçe ishte peshkaqeni absolut i fondeve të IT-së . Por të dyve këtyre iu pre filli në të njëjtën kohë. Shima u shkarkua nga detyra, ndërsa Meçes i shkëputën me buton të gjitha tenderat në AKSHI.
Kjo shton një dyshim. A ishte marrëdhënia Shima-Meçe thjesht ajo e dy palëve që i lidhte vetëm puna apo kishte më shumë se kaq?
Në tregun e IT-së ka zëra se Daniel Shima ka akses në kompaninë e Meçes. Një lloj aksesi i fshehtë, pa letra, për të cilin SPAK përgjithësisht përdor termin “ortak faktik”. Por ka dhe diçka tjetër, që i bën të gjitha zhvillimet e fundit edhe me interesante.
Prej disa kohësh, po qarkullojnë fjalë se SPAK do të bëjë së shpejti një lëvizje në botën e IT-së. Madje thuhet se disa drejtorëve të vegjël në AKSHI u janë gjetur dhe shuma cash, gjatë kontrolleve në banesa. Dhe kur rastësitë bëhen kapicë, procesi duhet kontrolluar. Ndaj ja çuan haberin të dyve.
Fillimisht Meçes, i cili para një javë u tërhoq me buton nga të gjitha ankimimet. Tashmë procedurat janë zhbllokuar dhe AKSHI ka filluar të lidhë kontratat miliardere. Me pak fjala, paraja filloi të rrjedhë përsëri.
Dhe pasi u sistemuan punët me Meçen, mbeti Shima. Për këtë të fundit, në AKSHI, druheshin se kishte filluar të fliste gjëra që nuk duhet të fliste. Ndaj këtë e vetësistemuan. Me orientim nga lartë dhe propozim nga poshtë.
Daniel Shima i futi një të grindur me të dashurën, i hipi makinës dhe u zhduk nja 10 orë pa nam e nishan, të reflektonte tek Shpella e Haxhi Aliut, ku nuk kishte valë telefoni dhe nuk shikonte dot as lajmet që po e kërkonte e gjithë Shqipëria.
Kohë rastësish të mëdha. Por loja vazhdon. /Kapitali.al
