Deputeti i Partisë Demokratike, Luan Baçi ka publikuar në rrjetet sociale pamje nga një vatër zjarri në Vajkan të Fierit, ku një sipërfaqe e konsiderueshme toke është përfshirë nga flakët.
Sipas deputetit të PD-së zjarri ka orë të tëra që përparon, ndërsa zjarrfikësit dhe policia nuk kanë reaguar. Ai iu ka bërë thirrje institucioneve që të bëjnë punën e tyre dhe të shkojnë menjëherë në vendngjarje në mënyrë që të bëjnë të mundur fikjen e flakëve.
“Zjarri në Vajkan, të NJ. V Mbrostar, Fier, mbrapa poligonit ka orë të tëra që po përparon dhe rrezikon të përhapet me shpejtësi dhe të shkaktojë dëme të konsiderueshme!
Banorët e zonës kanë bërë njoftimin e zjarrfikësve dhe policisë dhe askush nuk reagon!
I bëj thirrje institucioneve përgjegjëse të bëjnë detyrën e tyre dhe me urgjencë të shkojnë në vendngjarje, për fikjen e flakëve dhe minimizimin sa më shumë të dëmeve!
Me pa papërgjegjshmërinë e tyre, do të jete subjekt i ndjekjes penale!
Me cilësinë e deputetit të qarkut Fier dhe si anëtar i komisionit parlamentar të sigurisë kombëtare do të kërkoj vënien para përgjegjësisë penale të personave përgjegjës në institucionet përkatëse!”, shkruan Baçi.
Po ashtu në Seman të Fierit, një sipërfaqe e madhe toke është përfshirë nga flakët. Duke u favorizuar nga era zjarri ka përparuar me shpejtësi dhe për pasojë një shtëpi është përfshirë nga flakët. Nuk dihet në qoftë se shtëpia ishte e banuar apo jo, por si shihet nga pamjet e siguruara nga Gazeta Reforma flakët kanë përfshirë çatinë e banesës.
Një tjetër zjarr ka rënë edhe në Topojë të Fierit, ku vatrat e zjarrit kanë nisur në fushë dhe po përparojnë në drejtim të zonave të banuara.
