Tre persona të mbetur në det të hapur në Karaburun janë shpëtuar mbrëmjen e sotme, pas defektit që kishin pasur në mjetin e tyre lundrues.
Sipas Ministrisë së Mbrojtjes ata kishin dalë me mjetin lundrues me emrin “Aleksi”, i cili kishte pësuar defekt në linjën e aksit dhe ata kanë mbetur në mëshirën e dallgëve pranë Gjirit të Shën Janit.
Situata ka qenë e tmerrshme dhe rreziku sigurisht ka qenë i lartë.
Fatmirësisht iu ka ardhur në ndihmë Forca Detare shqiptare, e cila i ka marrë në bord tre personat dhe i ka nxjerrë në tokë. Mjeti me defekt u rimorkiua në Triport nga anija “Mati” e Forcës Detare.
