Opozita mbylli protestën pas më shumë se tre orësh mosbindje civile në Tiranë. Bomba molotov dhe flakadanë u hodhën drejt Kryeministrisë, fillimisht, ku u shënuan përplasje mes policisë dhe protestuesve.
Pjesë e përplasjeve ishin edhe grupi parlamentar i PD. Më pas protestuesit iu drejtuan selisë së PS ku hodhën bomba molotov duke djegur edhe banderolën me fotografinë e Edi Ramës. Mosbindja civile vijoi më pas drejt Ministrisë së Brendshme dhe Bashkisë së Tiranës ku skenari ishte i njëjti, bomba molotov dhe flakadanë.
Ndërkohë më herët, ekspertët e Policisë mbledhën provat lidhur me molotovët që janë hedhur në drejtim të forcave të rendit dhe selisë së PS-së. Në selinë e PS-së u vendosën ekspertët e kriminalistikës, ndërsa janë lënduar 12 punonjës policie dhe 7 qytetarë, pjesëmarrës në protestë.
