Trazirat në finalen e “Euro 2020” në 11 korrik në Wembley mund t’i kushtojnë rëndë Federatës Angkeze të Futbollit, pasi UEFA ka njoftuar të martën se do të hapë një procedurë disiplinore kundër institucionit anglez të futbollit, pas një hetimi mbi incidentet që ndodhën gjatë ndeshjes finale në Londër.
Tifozët britanikë që nuk kishin biletë organizuan trazira brenda dhe përreth stadiumit Wembley, duke thyer linjat e sigurisë dhe duke u përballur edhe me policinë.
Organi evropian hapi një hetim disiplinor dy ditë pas ndeshjes dhe ngriti katër akuza kundër Federatës Angleze: pushtimi i fushës nga tifozët e saj, hedhja e objekteve, fishkëllima gjatë himnit kombëtar dhe përdorimi i fishekzjarreve.
“Pas një hetimi nga një inspektor i Etikës dhe Disiplinës i UEFA -s, janë hapur procedura disiplinore kundër Federatës Angleze të Futbollit për një shkelje të mundshme të nenit 16 (2) (h) të Rregullores Disiplinore të UEFA -s nga mungesa e rendit ose disiplinës së ndjekësve të tij”, thuhet në deklaratën e UEFA -s.
Kujtojmë që ndeshja finale e Kampionatiti Europian u mbyll me fitoren e Italisë. “Të kaltrit” fituan me penallti ndaj Anglisë, pasi koha e rregullt u mbyll në barazimin 1-1, me gola të dy mbrojtësve, Luke Shaw për anglezët dhe Leo Bonucci për Italinë.
