Kandidati demokrat, për President të SHBA-së, Joe Biden, pas trazirave në godinën e Kapitolit, i bëri thirrje protestuesve që të tërhiqen nga dhuna, si dhe iu drejtua presidentit aktual, Donald Trump.
Ky i fundit ka reaguar më pas menjëherë.
Nëpërmjet një video-mesazhi, Trump i kërkoi qytetarëve dhe mbështetësve të tij që të heqin dorë nga dhuna dhe se është koha për të ikur në shtëpi.
‘E di që keni dhimbje, e di që jeni lënduar. Kishim zgjedhje që na u vodhën dhe të gjithë e dijnë, por ju duhet të shkoni në shtëpi tani. Duhet të kemi paqe, duhet të respektojmë ligjin. Nuk duam që asnjë të lëndohet.
Është një kohë e vështirë që nuk ka qënë më përpara kështu. Ishin zgjedhje të manipuluara por nuk mund të pranojmë që të lëndohen njerëz. Duhet të kemi paqe, kështu që shkoni në shtëpi. Ne ju duam! Jeni shumë special E di se si ndiheni, por shkoni në shtëpi dhe shkoni në paqe,” tha Trump në video-mesazhin drejtuar protestuesve.
Kujtojmë se gjatë ditës së sotme, gjatë procesit të votimit në Kongresin Amerikan, në godinën e Kapitolit për certifikimin e fitores së Joe Biden si President të SHBA-së në zgjedhjet e 3 nëntorit, ndodhën protesta të dhunshme, trazira dhe të shtëna me armë nga mbështetës të Trump. Këta të fundit thyen edhe kordonin e policisë dhe u futën brenda godinës së Kapitolit. Si pasojë votimi u pezullua përkohësisht për shkak të trazirave./Gazetareforma.com/
