Një incident i rëndë dhune është shënuar në kampin e Gjadrit, ku janë sistemuar 40 emigrantë të riatdhesuar nga Italia, pas urdhrave të dëbimit për shkak të rrezikshmërisë së tyre.
Konflikti ka nisur pasi 20 prej tyre kanë protestuar me dhunë, duke shkaktuar dëme të konsiderueshme në ambientet e brendshme të qendrës.
Janë thyer xhama, janë shkatërruar dyshekë dhe mobilie, ndërsa raportohet edhe për plaçkitje të dhomave.
Pas hetimeve të kryera mbi trazirat, 10 nga emigrantët më problematikë janë izoluar në qelitë e posaçme brenda kampit, ku lejohet vetëm kontakti me avokatët e tyre.
Ndërkohë, tre emigrantë kanë pësuar plagë me thikë të shkaktuara vetë, por ndodhen jashtë rrezikut për jetën pas ndihmës së marrë nga personeli mjekësor.
Të riatdhesuarit janë kryesisht shtetas nga Tunizia dhe Maroku, por ka edhe nga vende si Bangladeshi dhe Moldavia.
Ata mbërritën në Shqipëri të shoqëruar nga forca të shumta policore, pasi konsiderohen individë me rrezikshmëri të lartë.
Mediat italiane kanë raportuar se shumica e tyre kanë pasur rekorde kriminale në Itali, përfshirë tentativa vrasjeje, përdhunime, joshje të të miturve, trafik droge dhe krime kundër pronës apo personit.
Po ashtu, një pjesë e mirë e tyre kanë tentuar të mashtrojnë autoritetet me identitete të rreme.
