Bashkia e Fierit me anë të një njoftimi për shtyp i ka bërë thirrje shoferit që ka transportuar familjen e Eduart Sulos nga Zogu i zi, në Dërmenas, për në spital të vetëizolohet dhe të kërkojë ndihmën mjekësore.
Kjo sepse kjo familje është e prekur nga virusi, teksa bëhet me dije se transporti I saj është bërë në datën 3 mars, rreth orës 7:00.
Nga ana tjetër janë marrë masat edhe nga Njësia Administrative Darzezë, ku bëhet me dije se është mbyllur për arsye sigurie dyqani, ku kjo familje ka kryer pazaret gjatë kësaj kohe.
Po ashtu, policia po punon edhe për gjetjen e vajzës së familjes, banuese në Qenas, e cila u ka shërbyer gjatë kësaj kohe prindërve, teksa ka kërkuar bashkëpunimin e të gjithëve për të kuptuar rëndësinë e kësaj situate dhe respektimin e rregullave.
Ju rikujtojmë se ndjekja e udhëzimeve është tepër e rëndësishme, pasi përveç vetes rrezikojmë edhe të tjerët.
Kështu ka ndodhur së fundmi edhe në Berat, ku një grua e cila ishte kthyer nga Italia e ka fshehur këtë fakt, duke bërë që stafi mjekësor të vetëkarantinohet.
Pacientja i gënjeu, stafi mjekësor i Spitalit Rajonal Berat përfundon në karantinë
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
