Të gjithë operatorët aktualë dhe ata të rinj që duan të futen në biznesin e transportit të udhëtarëve, si atë urban dhe interurban, do të pajisen me licenca on-lene vitin që vjen.
Për 2021-in Ministria e Infrastrukturës dhe Energjisë ka parashikuar vetëm dhënie të shërbimit on-line për licencimin e operatorëve të biznesit që ofrojnë shërbim të transportit të udhëtarëve, duke futur këtu edhe ata që operojnë jashtë Shqipërisë.
Licencimi i operatorëve të transportit të udhëtarëve nëpërmjet procesit të dixhitalizimit do të kryhet pas përfundimit të afateve të vlefshmërisë të licencës aktuale.
MIE nëpërmjet një urdhri të botuar në Fletoren Zyrtare ngarkon Drejtorinë e Përgjithshme të Shërbimit të Transportit Rrugor, të ngrejë komisionin e vlerësimit dhe ndjekjen e procedurave për përzgjedhjen me konkurs të hapur të subjekteve që operojnë në linja të rregullta ndërqytetëse udhëtarësh; nënshkrimin e licencave dhe të certifikatave të operimit, për transportin ndërqytetës të udhëtarëve; nënshkrimin e certifikatave për transport ndërkombëtar dhe të brendshëm të rastit.
Sipas Zv.drejtorit të Përgjithshëm i Drejtorisë të Shërbimit të Transportit Rrugor, Endri Haxhiu, procesi në tërësi i jep zgjedhje shqetësimit të ngritur nga operatorët, pasi synon eliminimin e burokracive dhe rrit transparencën.
Për zbatimin e procesit Drejtoria e Shërbimit të Transportit do të koordinojë punën edhe me Qendrën Kombëtare të Biznesit.
/Burimi: Monitor.al/ Përshtati: GazetaReforma.com/
