Prokuroria e Tiranës ka kërkuar arrestimin e dy individëve, Arlinda Markudhe dhe Darin Gezdari, të akuzuar për mashtrim dhe pastrim parash në vlerën e 11 milionë eurove.
Dyshimet lidhen me transferimin e këtyre fondeve nga kompani guaskë jashtë vendit drejt Shqipërisë, përmes një skeme kriminale.
Sipas hetimeve të kryera nga Drejtoria e Hetimit Tatimor, Seksioni i Hetimit të Pastrimit të Parave në Policinë e Tiranës dhe Agjencia e Inteligjencës Financiare, skema përfshinte transferime bankare përmes kompanive guaskë të regjistruara në parajsa fiskale si Qipro, Gibraltari dhe Malta.
Paratë më pas kaloheshin në kompani të krijuara fiktivisht në Shqipëri, për t’u transferuar më tej në Kanada.
Ky aktivitet kriminal dyshohet se është zhvilluar gjatë dy viteve të fundit.
Operacioni i koduar “Cost to Cost” u finalizua pas një pune hetimore disa mujore. Nga hetimet rezulton se përveç dy të arrestuarve, mund të jenë të përfshirë edhe persona të tjerë, shqiptarë dhe të huaj.
Prokuroria po punon për dokumentimin e plotë të aktivitetit kriminal dhe ndjekjen penale të të gjithë të përfshirëve.
