Këtë të hënë ministrja e Energjisë dhe Infrastrukturës Belinda Balluku ka prezantuar projektin e shumëpërfolur të Portit të ri të Durrësit që do të ndërtohet në Porto Romano. Ministrja tha se bëhet fjalë për një investim që do të kushtojë 390 mln euro, si dhe porti i ri tregtar pritet të punësojë 1500 vetë. Blluku tha se porti i ri do të jetë një pronë e përbashkët e Shqipërisë, Kosovës dhe Maqedonisë së Veriut.
“390 mln euro investim, ku pritet të punësohen 1500 vetë. Do ketë një hekurudhë të brendshme që lidh terminalin dhe 8 km hekurudhë që e lidh Porto Romanon dhe Portin e Durrësit me hekurudhën Tiranë-Durrës. 46 përqind e investimit do të jetë nga qeveria shqiptare, ndërsa pjesa tjetër nga kompania ndërtuese që do të dalë përmes një gare ndërkombëtare”, tha Balluku.
Ministrja u shpreh se gara ndërkombëtare për kompaninë ndërtuese do të hapet fund të janarit 2023 dhe do të mbyllet në korrik të po atij viti.
Kujtojmë se qeveria ka planifikuar të prishë portin ekzistues për të ndërtuar një marinë dhe kompleks pallatesh, pra për ta kthyer në një atraksion turistik dhe portin ta zhvendosë në Porto Romano. Ky projekt 2 miliardë dollorësh është thënë se do të zhvillohet nga prici i kurorës Mohamed Alabaar që zotëron kompaninë Emaar. Por ky projekt është denoncuar nga opozita si një mega aferë, kjo për shkak edhe të transparencës së vakët nga qeveria.
