Ditën e sotme një tragjedi ka ndodhur në brigjet jugore të Greqisë, ku një anije është mbytur e për pasojë 59 persona kanë mbetur të vdekur.
Siç raportohet nga mediat greke, numri i emigrantëve të pranishëm ishte rreth 400 persona dhe deri më tani janë shpëtuar 104 prej tyre të cilët pritet të mbërrijnë në portin e Kalamatës. Ndërkohë vijojnë operacionet e kërkim shpëtimit për emigrantët e tjerë të zhdukur.
Katër nga të mbijetuarit u shtruan në spital me simptoma të hipotermisë. Mbetet akoma e paqartë se sa pasagjerë mund të kenë mbetut të zhdukur në det, pas mbytjes së anijesë në mënyrë tragjike në brigjet jugore të Greqisë.
Bëhet me dije se gjashtë anije të rojes bregdetare, një fregatë e marinës, një aeroplan transporti ushtarak, një helikopter i forcave ajrore, disa anije private dhe një dron nga agjencia e mbrojtjes së kufijve të Bashkimit Evropian, Frontex, morën pjesë në kërkimin e vazhdueshëm. Anija me destinacion Italinë mendohet të ketë lundruar nga zona e Tobruk në Libinë lindore. Roja bregdetare italiane lajmëroi fillimisht autoritetet greke dhe Frontex për anijen që po afrohej të martën.
Zyrtarët e Rojës Bregdetare vlerësojnë se numri i incidenteve të tilla do të rritet, pasi shtohet numri i emigrantëve që, qoftë nga brigjet turke, qoftë nga Afrika e Veriut, udhëtojnë kryesisht drejt Italisë për t’u nisur më lehtë drejt Europës Qendrore dhe Veriore. Varkat janë të vjetra dhe shumë prej tyre nuk janë mirëmbajtur, ndërsa numri i pasagjerëve është shumë më i lartë se sa lejohet.
