Mbrëmjen e sotme një aksident i rëndë ka ndodhur në vendin e quajtur “Qafa e Koshovicës” në Fier. Policia bën me dije se një këmbësor ka ndërruar jetë si pasojë e përplasjes nga një automjet tip “Audi” me shofer 31 vjeçarin me inicialet E.ZH.
“Fier / Informacion paraprak
Rreth orës 18:00, në vendin e quajtur “Qafa e Koshovicës”, shtetasi E. Zh., 31 vjeç, banues në Çerven, duke drejtuar automjetin tip “Audi” ka aksidentuar një këmbësor, rreth 70 vjeç, i cili ka ndërruar jetë. Grupi hetimor po punon për zbardhjen e rrethanave të aksidentit dhe identifikimin e shtetasit që ndërroi jetë”, bëhet me dije në njoftimin e Policisë së Shtetit.
Në muajin Tetor 2022 numërohen 84 aksidente rrugore nga 127 të ndodhura në muajin Tetor 2021. Numri i aksidenteve rrugore është ulur me 33,9 %.
Periudha Janar-Shtator 2022 ka shënuar 122 viktima nga aksidentet rrugore në të gjithë vendin, ose 29 më pak krahasuar me të njëjtën periudhë të një viti më parë. Për kreun e Policisë Rrugore, ulja e aksidenteve në vitin 2022 vjen dhe si rezultat i aplikimit të pajisjeve inteligjente nga ana e uniformave blu.
Por duhet theksuar se bazuar edhe në atë që ka ndodhur vitet e kaluara, ardhja e emigranteve për festat e fundvitit në Shqipëri sjell një rritje të aksidente rrugore në vend.
