Një ngjarje tragjike ka ndodhur në spitalin Infekiv në kryeqytet, ku një grua 4 muajshe shtatzënë ka ndërruar jetë pasi ishte e infektuar nga Covid. Bëhet me dije se e ndjera kishte qëndruar në shtëpi derisa 90% e kulmonit të saj ishte dëmtuar dhe ka qenë në gjendje kritike për jetën kur shkoi në spital.
Si pasojë e vdekjes së saj, nuk ka mundur të mbijetojë as fëmija, ndërsa mësohet se gruaja ka qendruar në reanimacion prej dy ditësh, por fatkeqësisht nuk ka mundur të fitojë betejën me virusin. Bëhet me dije se ajo ka ndërruar jetë ditën e djeshme.
“Aktualisht në Spitalet COVID po marrin trajtim 155 pacientë, nga të cilët 21 janë në gjendje më të rënduar. Ndër pacientët në gjendje të rëndë në terapinë intensive, është edhe një grua 4-muajshe shtatzënë”, njoftonte Ministria e Shëndetësisë një ditë më parë.
Mjekët kanë treguar vazhdimisht se nuk janë të pakta rastet kur pacientët shkojnë në spital vetëm në javën e dytë të infektimit ose atëherë kur është shumë vonë për të vepruar dhe si pasojë humbasin dhe jetën.
Po ashtu, ky nuk është rasti i parë i një gruaje shtatzënë që ndërron jetë nga Covid. Ndërkohë, disa ditë më parë një 24-vjeçare e prekur nga virusi, u dërgua për kurim në Turqi, pasi lindi foshnjën dhe gjendja e saj ishte e rënduar.
