Nga sulmet me bombë në Sri Lanka mediat e huaja theksojnë se policia ka arrestuar 7 persona si autorë të dyshuar për sulmin terrorist, në kisha dhe hotele luksoze.
Sipas të dhënave të fundit rezultojnë rreth 207 persona qe kanë humbur jetën dhe rreth 450 janë të plagosur.
Ka qënë ministri i mbrojtjes i Sri Lanka, Ruwan Wijewardena, i cili konfirmoi arrestimet, sipas Associated Press.
Tetë shpërthime, që mendohet se kanë patur shënjestër besimtarët dhe turistët, ndodhën sot, ndërsa lufta e përgjakshme civile e vendit të Azisë Jugore përfundoi një dekadë më parë.
Numri i viktimave pritet të rritet, për shkak se shumë persona që janë të plagosur ndodhen në gjendje të rëndë
Askush nuk e ka marrë ende përgjegjësinë për sulmin, por ministri i brendshëm, tha se sulmuesit janë identifikuar dhe ata janë ekstremistë fetarë.
Fillimisht Sri Lanka u godit nga gjashtë shpërthime, tri prej të cilave ndodhën në kisha dhe tri të tjera në hotele luksoze. Më vonë ndodhën edhe dy shpërthime tjera, duke e çuar në tetë numrin e përgjithshëm të shpërthimeve.
Të paktën 35 të huaj besohet të jenë ndër personat që kanë humbur jetën.
