Një ngjarje e rëndë ndodhi disa ditë më parë në Tetovë, ku një spital i përshtatur për të kuruar pacientët me COVID-19, ka marrë flakë e për pasojë kanë humbur jetën 14 persona.
Ditën e sotme kryetarja e Komunës së Tetovës, Teuta Arifi në një deklaratë për mediat ka thënë se hetimet në spitalin që u shkrumbua nga zjarri në Tetovë kanë përfunduar. Ajo ka treguar se po bëhet përmbledhja e dokumenteve përkatëse dhe po merren në pyetje dëshmitarët. Po ashtu Arifi ka lajmëruar se në krye të detyrës për të bërë të mundur zbardhjen e plotë të rrethanave të ngjarjes, është edhe ekipi i ekspertëve gjermanë.
Sjellim në vëmendje se autoritetet lokale kanë konfirmuar ditën e sotme se ekspertët gjermanë tashmë janë pjesë e ekipit që duhet të hetojë shkaqet e zjarrit, por deri më tani Qeveria dhe Prokuroria nuk kanë informacion më të detajuar në lidhje me hetimet.
“Siç jam e informuar, hulumtimet në vendngjarje kanë përfunduar. Është duke u bërë përmbledhje e dokumentacionit, e të dhënave që kërkohet zyrtarisht nga institucionet si dhe është duke u bërë mbledhja e dëshmive, e dëshmitarëve dhe sistemimi i tyre. Në të njëjtën kohë, në punë është edhe ekipi gjerman i ekspertëve të cilët janë të specifikuar për rekonstruim të ngjarjes, në këtë moment është faza e hulumtimit”, tha Arifi.
