Tragjedia që ndodhi 5 ditë më parë në një hotel në Qerret të Kavajës ku humbën jetën 4 turistë rusë. Edhe pse kanë kaluar disa ditë ngjarja e rëndë mbetet një mister, për autoritetet shqiptare.
Ditën e sotme shefi i departamentit të ujit dhe mjedisit në Institutin e Shëndetit Publik, Arben Luzati deklaroi se ISHP ka kthyer pas provat materiale të marra në ujin e pishinës dimërore dhe klorin e përdorur në të.
Sipas tij, provat e marra nga vendi i ngjarjes nga ana e oficerëve të Policisë Gjyqësore nuk ishin në normat e kërkuara nga ligji. Ndaj janë detyruar që të shkojnë sërish vetë në vendin e ngjarjes, për të marrë sërish mostra uji dhe klori nga pishina dimërore.
Nga ana tjetër, Prokuroria e Kavajës ka vendosur që trupat e katër viktimave të qëndrojnë në morg deri sa të ketë një përgjigje nga mjekësia ligjore për shkakun e vdekjes.
Autoritetet ruse kanë kërkuar vetëm zbardhjen e shkakut të vdekjes, por deri më tani nuk kanë sjellë asnjë ekspert për të ndihmuar autoritetet shqiptare.
Gjithashtu si është bërë me dije trupat e katër turistëve rusë pritet të tërhiqen nga djali i familjes, i vetmi i mbijetuar, i cili ndodhej në Rusi në momentin që ndodhi tragjedia. Kujtojmë se drejtësia shqiptare e regjistroi çështjen si vrasje dhe po heton në këtë drejtim edhe pse nuk përjashtohet pista e helmimit.
