Vdekja e katër turistëve rusë në Qerret të Kavajës, vazhdon të jetë e mbushur me mister.
Së fundmi në lidhje me këtë ngjarje ka folur edhe Maria Bucakiskam, 30-vjeçarja ukrainase e cila ka qenë edhe shoqëruesja turistike (Guida) e katër turistëve që humbën jetën. Mësohet se ajo ka treguar përpara hetuesisë të gjithë intinerarin që kanë përshkuar nga Maqedonia e Veriut në Shqipëri. Po ashtu 30-vjeçarja ka treguar edhe të gjitha ushqimet që ata kanë konsumuar.
Syri.net shkruan se Maria Bucakiskam, 30-vjeçarja ukrainase që shërbeu si guidë në Shqipëri për familjen Burenkova, Sergey Burenkov, 60 vjeç, dhe bashkëshortja Natalya Burenkova, 58 vjeç, vajzën e tyre, Ekaterina, 31 vjeç, dhe partnerin e saj, Nikita Belousov, thotë se Sergei e Natalia Burenkov, vajza e tyre Ekaterina dhe dhëndri Nikita Belousov, kanë qenë shumë të kënaqur me udhëtimin dhe nuk kanë pasur shqetësime, qoftë edhe shëndetësore.
Në orën 7 të mëngjesit, sipas Bucakiskam, familja e Sergeit, së bashku me 4 turistë të tjerë, po nga Rusia, të drejtuar nga janë nisur nga Qerreti në drejtim të Ohrit, në Maqedoni. Fillimisht ajo tregon se kanë ndaluar në dalje të Librazhdit, ku secili ka konsumuar ushqimet që kishin marrë me vete. Më tej kanë kaluar kufirin, dhe rreth orës 13 të mesditës së të premtes janë ulur në një restorant në qendër të Ohrit.
Sipas deklarimeve të Bucakiskam, të gjithë pjesëtarët e grupit, përfshirë edhe 4 turistët e ndjerë, kanë porositur thuajse të njëjtat ushqime- piskavica, pak peshk dhe disa prej tyre kanë marrë edhe nga një gotë raki.
Gjithashtu ajo ka shtuar se nuk ka vërejtur asnjë shenjë gjatë shoqërimit që 4 viktimat të kishin varësi ndaj alkoolit apo substancave narkotike.
Sjellim në vëmendje se ekspertiza po pret rezultatin lidhur me klorin e ujit të pishinës, si edhe mundësinë e helmimit nga ndonjë gaz i mundshëm, pavarësisht se në vendngjarje nuk u gjetën shenja të kësaj natyre. Prokuroria është fokusuar në pistën e vrasjes.
