Qeveria e Serbisë pritet të shpallë të martën, më 18 mars 2025, ditë zie në shenjë solidariteti me viktimat e tragjedisë në Koçan, Maqedoninë e Veriut. Vendimi do të merret në mbledhjen e nesërme të qeverisë, me propozim të presidentit Aleksandar Vuçiç, pas zjarrit shkatërrues në një diskotekë që ka marrë jetën e 59 personave dhe ka lënë të plagosur 155 të tjerë.
Sipas njoftimit zyrtar të qeverisë serbe, kryeministri Millosh Vuçeviç dhe presidenti Vuçiç kanë diskutuar mëngjesin e sotëm për ngjarjen tragjike dhe kanë rënë dakord për shpalljen e ditës së zisë në Serbi.
Zjarri i rëndë shpërtheu gjatë një koncerti të një grupi të njohur maqedonas, duke shkaktuar panik dhe një bilanc tragjik. Shumica e të plagosurve janë transportuar në Spitalin e Përgjithshëm të Koçanit, ku po marrin trajtim mjekësor.
Autoritetet lokale dhe ekipet e emergjencës po vijojnë hetimet për të zbuluar shkaqet e këtij zjarri fatal.
