Një ngjarje e rëndë është regjistruar paraditen e së dielës në zonën përballë Shkëmbit të Kavajës, ku një turist nga Gana ka humbur jetën dhe një vajzë ndodhet në gjendje të rëndë, pas një aksidenti me motor uji.
Sipas njoftimit zyrtar të Policisë së Durrësit, rreth orës 11:15, mjetet patrulluese të Policisë Kufitare janë informuar për dy persona që kishin rënë në det, pasi dyshohet se kishin humbur kontrollin mbi motorin e ujit me të cilin po lundronin. Policia ka ndërhyrë menjëherë dhe i ka transportuar të dy personat drejt portit të Durrësit, ku i priste një autoambulancë për dërgimin e tyre në spital.
Nga verifikimet e para të ekipit të urgjencës mjekësore rezulton se shtetasi S. O., 34 vjeç, me origjinë nga Gana dhe banues në Angli, kishte ndërruar jetë. Ndërsa vajza që ndodhej me të, e identifikuar si V. B., 31 vjeçe, po ashtu me banim në Angli, u dërgua në spital në gjendje të rëndë shëndetësore, në shok.
Dy turistët nuk posedonin dokumente identifikuese në momentin kur u gjetën nga policia, ndërkohë që autoritetet kanë ngritur menjëherë një grup hetimor për të sqaruar plotësisht rrethanat e ngjarjes.
Policia dhe Prokuroria po vijojnë punën për të dokumentuar ligjërisht rastin dhe për të përcaktuar nëse janë respektuar të gjitha protokollet e sigurisë në përdorimin e mjeteve lundruese për turistët në zonë.
