Një ngjarje e rëndë ka ndodhur në Republikën Demokratike të Kongos. Të paktën 60 persona kanë ndërruar jetë në lumin Kongo.
Steve Mbikayi, ministër për veprim humanitar, tha se 700 njerëz ishin në bordin e anijes që u fundos afër fshatit Longola Ekoti, në provincën Mai-Ndombe, natën e kaluar.
“Deri më tani ekipi i shpëtimit ka gjetur 60 trupa të pajetë dhe 300 të mbijetuar. Ende ka disa të zhdukur pas shkatërrimit të anijes,” tha Mbikayi.
Anija ishte nisur nga kryeqyteti, Kinshasa dhe po drejtohej për në provincën Ekuator.
“Shkaku kryesor i fundosjes mbetet mbingarkesa e mallrave dhe numri i tepërt i udhëtarëve,” tha ministri, duke shtuar “se lundrimi natën u bë shkak për fundosjen e saj”.
Aksidentet me varka janë të zakonshme në vendin e pasur me minerale. Anijet shpesh janë të mbingarkuara me pasagjerë dhe ngarkesa. Shumica e udhëtarëve që udhëtojnë me anije gjithashtu shpesh nuk veshin xhaketa shpëtimi.
Muajin e kaluar, të paktën tre persona, dy fëmijë dhe një grua, u mbytën pasi një anije pasagjerësh u fundos në liqenin Kivu.
Në maj të vitit 2020, 10 persona, përfshirë një vajzë 8 vjeçare, vdiqën pasi anija me të cilën po udhëtonin u përmbys në liqenin Kivu.
Në korrik 2010, më shumë se 135 njerëz humbën jetën pasi një anije u përmbys në provincën perëndimore të Bandundu.
