Prokuroria e Fierit ka çuar për gjykim Pandeli Petanin dhe Shpëtim Kalemin, të akuzuar për trafikimin e veprave të artit.
Sipas njoftimit të Prokurorisë, njëri prej të pandehurve, i ndihmuar nga një tjetër, ka kryer tregtimin e pasurisë kulturore pa qenë i licencuar nga Ministria e Kulturës, Ekonomisë dhe Inovacionit.
Gjatë hetimeve, u sekuestruan pushkë, ikona, portrete dhe epitaf të vlerësueshme.
Dy të arrestuarit, Petani dhe Kalemi, u kapën më 19 dhjetor të vitit të kaluar, të akuzuar për vjedhjen e ikonave dhe pikturave antike, kryesisht nga autorë grekë.
Prokuroria sqaron se, përmes metodave speciale të hetimit, u provoua se Petani kishte ndërmarrë veprimet e nevojshme për të shitur veprat e artit më 18 dhjetor 2023, nëpërmjet agjentëve nën mbulim, pa u licencuar nga autoritetet përkatëse, siç kërkohet nga ligji nr. 27/2018 për trashëgiminë kulturore. Petani u ndihmua nga Kalemi gjatë këtij aktiviteti të paligjshëm.
Përveç artefakteve të tjera, i pandehuri Petani kishte në posedim:
• Pushkë/revole nga shekulli XVIII-XIX, e zbukuruar me motive floreale;
• Ikonë “Lindja e Krishtit”, nga periudha e pikturës pasbizantine;
• Portret “Eros”, realizuar me mermer të bardhë;
• Epitaf “Vajtimi i mbivorrshëm”, i punuar me material tekstili dhe qëndisje, me figura shenjtorësh të realizuara nga metali.
Gjykata e Shkallës së Parë e Fierit shpalli të pandehurit P.P. dhe Sh.K. fajtorë për akuzat e trafikimit të veprave të artit dhe kulturës.
