Është shpërbërë tërësisht një grup kriminal në Itali, që përbëhej nga shqiptarë dhe italianë.
Operacioni i koduar “Shqiponja e zezë 2018” ka përfunduar me sukses, duke kapur në flagrancë pjesëtarët e fundit të grupit.
Të arrestuarit akuzohen për trafikim ndërkombëtar të lëndëve narkotike, mbajtja e armëve të paligjshme dhe posedim i mallrave të vjedhura.
Droga mblidhej në Holandë dhe importohej në Itali, ku shitej në tregjet e drogës.
Mediat fqinje kanë bërë me dije identitetet e tyre: Fabrizio Borghi, Fabrizio Fabietti, Christian Testo, Luciano Russo dhe Alvaro Vyshka.
Më herët, në kuadër të të njëjtit operacion, janë arrestuar nëntë persona me nënshtetësi shqiptare e italiane.
Konkretisht, pas arrestimit të kreut të organizatës në Itali, Lulzim Daiu, një nga bashkëpunëtorët e tij të ngushtë, Artan Monari, me bashkëpunimin e Alvaro Vyshkës, kishte marrë përsipër kryerjen e aktiviteteve të paligjshme duke pasur kontakt me furnizuesit e Daiut në Holandë dhe kryheshin importe të shumta të kokainës që u shiteshin blerësve italianë, katër romakëve të arrestuar, të cilët e shisnin atë në sheshet e tregtimit të drogave të Tor Bella Monaca dhe San Basilio.
Grupi dyshohet se kishte lidhje edhe me grupe të tjera në Spanjë e Kolumbi.
Hetimet e mëvonshme nxorën në dritë disa emra të organizatës në Itali, të cilët transportonin drogëra në sheshet e Romës.
Personat përgjegjës për transportin ishin Artan Monari, Alvaro Vyshka, si dhe italianët Fabrizio Borghi, Fabrizio Fabietti, Christian Testo, Luciano Russo.
Këta persona, gjatë periudhës shtator – nëntor 2018 kanë transportuar së paku 85 kilogramë lëndë narkotike, kryesisht kokainë.
Tashmë organizata është shpërbërë dhe anëtarët e saj janë vënë para drejtësisë.
